IMD WEATHER NEWS | गेल्या काही दिवसांपासून महाराष्ट्रातलं आभाळ जणू फुटलंच की काय असं वाटतंय. पहाटेपासून रात्रीपर्यंत सतत धारोदार पाऊस, रस्त्यांवर पाणी, गावोगावी शाळा बंद, धरणं तुडुंब भरून वाहती अशी परिस्थिती झालीय. आणि याच दरम्यान भारतीय हवामान विभागाने (IMD) आणखी मोठा इशारा दिलाय. IMD WEATHER NEWS
गावकऱ्यांच्या म्हणण्यानुसार, दोन दिवसांपासून घरात पाणी साचलंय, मुलं शाळेत कशी जाणार? असं विचारून प्रशासनाने थेट सुट्टीच जाहीर केली. नांदेडच्या उमरखेड-महागाव तालुक्यात कालच अतिवृष्टी झाली, त्यात आजच्या अंदाजामुळे सर्व शाळा-महाविद्यालयं बंद ठेवण्यात आली. तिथंच वसमत आणि औंढा नागनाथ तालुक्यातही परिस्थिती तशीच. मुलांना अचानक मिळालेल्या सुट्टीचा आनंद असला तरी मोठ्यांच्या कपाळावर आठ्या आहेत शेतात पाणी जास्त झालं तर पिकं सडतील की काय ही भीती.
दरम्यान, परळी तालुक्यातील नागापूर धरण ओव्हरफ्लो झालंय. या धरणातून पाणी वाहू लागल्यामुळे परळी शहरासह १७ गावांचा पिण्याचा पाण्याचा प्रश्न सुटला, पण खालील गावांमध्ये धास्तीचं वातावरण आहे. धरण भरलं की आनंदही असतो आणि धोका पण… असं सांगताना गावकरी काळजीपूर्वक नदीकाठाकडे पाहताना दिसले.
गोंदिया जिल्ह्यात तर कालच्या पावसानं पुजारीटोला धरणाची पातळी वाढली. प्रशासनानं ८ दरवाजे उघडून ६३५९ क्यूसेक पाणी विसर्ग केलंय. नदीकाठच्या लोकांना सतर्कतेचा इशारा देण्यात आलाय. आम्ही नदीपात्रातून रोज ये-जा करतो, पण आता मनात धाकधूक आहे, असं तेथील लोकांनी सांगितलं.
पावसाचा फटका फक्त महाराष्ट्रालाच नाही. आंध्रप्रदेश, गोवा, ओडिसा, आसाम, मेघालय, राजस्थान, गुजरात, हरियाणा, दिल्ली, हिमाचल, कर्नाटक, पंजाब, तामिळनाडू या सगळ्या राज्यांमध्येही मुसळधार पावसाचा इशारा आहे. तेलंगणात धरणातून पाण्याचा मोठा विसर्ग सुरू असून, त्याचा परिणाम महाराष्ट्र तेलंगणा सीमेवर जाणवतोय. गडचिरोली जिल्ह्यातील सिरोंचा आणि अहेरी तालुक्यांना अलर्ट देण्यात आलाय. नदीकाठच्या गावकऱ्यांनी जरा खबरदारी घ्यावी, रात्रौ आडवा-ओढवा टाळावा, असं प्रशासन सांगतंय.
मुंबई, कोकण, मराठवाडा या भागात पावसाने आधीच कहर केला आहे. शहरात पाणी साचल्यामुळे वाहतूक कोंडी तर खेडोपाड्यात शेतात पाणी साचून शेतकरी हवालदिल झालेत. पण दुसरीकडे काही भागातल्या प्रकल्प-बांधाऱ्यांना ओसंडून वाहताना बघून लोकांच्या चेहऱ्यावर हसू उमटलंय पाणी आहे म्हणजे पिकं टिकतील, तहान भागेल.